كيفيه تهيئ طفلك للاستحمام

كتير من الأمهات بتلاقي صعوبه في استحمام الأطفال في الحمام... 

اللي بيخاف من الماية 💣... واللي تلاقيها بتصرخ من تواجدها في الحمام💥.. واللي بيترعب من الدوش 💦..

ومواجهة الوضع ده بيكون بطريقتين للأمهات:
اما بتجبر الطفل علي الاستحمام وتدخله بالعافيه وتخلص بسرعة ويصرخ او يعيط مش مهم المهم المهمة تخلص بنجاح ويبقي نضيف 💫
او انها بتحايل وتدلع وتبدأ تدور علي حلول تتجنب دخوله الحمام وتجيب اطباق كبيرة وبانيو وتنقل ادوات الاستحمام بره الحمام 😑

وفي الواقع الطريقتين غلط ❌

طيب ايه الطريقة الصحيحة ✅؟؟!!

الخطوات الصحيحة:
١- لازم نهيئ للطفل من وهو بيبي لليوم ده.. بإننا لما ندخل بيه نفرجه علي كل حاجه في الحمام ويشوف نفسه في مراية الحمام ونعرفه علي اسماء كل شئ فيه حتي لو لسه مابيتكلمش عادي

٢- قبل دخول الطفل نهيئه اننا داخلين ناخود دوش بالمايه الجميلة 🛀.. ونوصفله هنعمل ايه جوا بالظبط 👍

٣- نحضر اللبس ونخلي الطفل يختار حتي لو صغنون اللي يمسكه ويطلعه من الدولاب نختار منه وممكن يجيب هو الفوطة بتاعته او البامبرز وهكذا 💓 بمساعدتك او لوحده

٤- وقت الدخول بلاش ناخود الطفل هيله بيله كدا ( مرة واحده ) او نشيله ❌ لاه غلط.. الام تدخل جوا وتطلب منه يجي ولو لسه بيتعلم المشي تمسك ايده وتمشيه خطوه خطوه وتحسسه انهم رايحين مكان حلو

٥- نيجي بقي لمرحلة الوحش 😂 دخل الطفل او البيبي ومرة واحده بنقوم فاتحين الدوش وبالتالي بيصرخ لإنه مش فاهم المايه دي جت منين كدا 🤔.. لكن الأول نعرفه ان ده المايه من هنا ونفتح بشويش وممكن نفرج الطفل نفسه في ضهر السماعة بتاعة الدوش بتكون عاكسه وبيكون صورته ظاهرة.. كنت بطلب من ابني انه يعمل بااي لنفسه وده كان بيشغله جدا وأحيانا كان يحب يمسك السماعة بنفسه ويلعب بيها 😊.. وده بيلفت انتباهه لحاجات حلوة في الحمام لإنه مكان مغلق بالنسباله وبيكون في صدي صوت وده اكتر شئ بيرعب الطفل.

٦- نطلب من الطفل انه يختار لعبه صغنونه او اتنين تدخل تاخود دوش معاه.. ممكن دبدوب ممكن عروستها او لعب بلاستيك الخفيفه تعوم معاه وهكذا 💓
وده بيخليه حاسس بالدعم النفسي وان العابه اللي هي جزء منه بتشاركه حمامه وبتسليه كمان 😍

٧- نهتم ان البيبي يكون مرتاح.. ممكن يكون استخدام نوع معين من الشامبو بيدخل في عينه مثلا وده بردو بيدايقه

٨- نخلي وقت الحمام وقت مسلي وممتع وكمان ممكن يكون اكتر وقت يتعلم فيه الطفل منك حاجات مهمه.. ممكن نعد ونقول الأرقام.. ممكن نغني اعنيه... ممكن نعرفه كل حاجه ويقول ورانا اسمها علشان يتكلم اسرع.. لو اكبر شويه نعرفه اكتر